‘Level 2 pusher’ sa Bantayan sikop
CEBU, Philippines - Nasikop sa kapolisan ang giilang level 2 drug pusher sa isla sa Bantayan ug nakuhaan og ubay-ubay nga drugas sa usa ka buy-bust operation sa Barangay Binaobao, lungsod sa Bantayan kagahapon sa hapon. Ang dinakpan mao si Reggie Tabinas, alyas Babalu, 26, lumad nga taga lungsod sa Santa Fe sa maong isla.
Matud ni Senior Insp. Jaime Santillan, hepe sa Bantayan Police Station, nga nahinabi sa Banat News nga human nakompirmar ang kalihukan ni Tabinas, gipahigayun dayon ang operasyon nga niresulta sa pagkasikop sa suspetsado.
Nakuha sa kapolisan gikan sa posesyon sa dinakpan ang tulo ka dagkung pakete ug usa ka medium size sa gituohang shabu, usa ka timbangan, usa ka cellphone ug usa ka P100 bill nga marked money.
Sumala pa nga si Tabinas ang naila nga tighandos sa drugas sa maong lugar diin padayong gisubay sa kapolisan kung asa gikan ang supply sa dinakpan. Gitanggong na sa Bantayan Police detention cell ang dinakpan nga gikatakdang pasakaan og kasong pagbaligya sa drugas karong adlawa. (BANAT NEWS)
- Latest
