Gikan sa hotel gilabnihan
CEBU, Philippines - Nadakpan sa usa ka guwardiya ang nanglabni sa shoulder bag sa babayeng kustomer sa usa ka hotel sa dalan A.S. Fortuna, Bakilid, dakbayan sa Mandaue kagahapon sa hapon.
Ang nadakpan mao si Michael Leyson, 39-anyos, taga Pulang Bato, Talamban, dakbayan sa Sugbo ug ang biktima mao si Apple Xiana Buhian, 23-anyos.
Si SPO1 Michael Limalima sa Presinto 2 sa Mandaue City Police Office miingon nga gikan sa usa ka hotel ang biktima ug naglakaw padulong sa gawas aron pag-atang og taxi apan gisugat sa suspetsado ug gilabni ang shoulder bag.
Nakasinggit ang biktima sa pagpangayo og panabang nga maoy nakapa-alarma sa mga guwardiya sa hotel ug nagtinabangay og gukod nga miresuta sa pagkasikop sa suspetsado. Nabawi ang bag sa biktima nga gisudlan sa duha ka cellphones, alahas ug salapi samtang ang suspetsado gitanggong ug gikatakdang pasakaan og kaso sa biktima karong adlaw. (BANAT NEWS)
- Latest
