Dinunggabay sa tabo usa patay

CEBU, Philippines - Patay ang usa ka lalaki samtang laing duha ang samdan sa nahitabong dinunggabay sa usa ka tabo sa barangay Bayabas, dakbayan sa Danao niadtong Sabado sa gabii.

Ang namatay mao si Primitivo Largo, 51, minyo ug mag-uuma samtang samdan ang iyang kauban nga si Gregorio Tañana, 63 ug ang suspetsado nga si Reneboy Hermoso, 48, pulos nagpuyo sa maong lugar.

Matud ni SPO4 Arestio Espina sa Danao City Police Station nga nahinabi sa Banat News nga nag-abot ang tulo sa usa ka tabo-tabo sa maong lugar ug sa wala pa masayri nga hinungdan nahitabo ang kagubot ug dinunggabay.

Nakaangkon og dinunggaban sa tiyan si Largo hinungdan sa iyang kamatayon samtang samad sa bukton ang naangkon ni Tañana ug nadunggaban usab sa tiyan si Hermoso.

Human sa hitabo dali nga misibat si Hermoso ug nagpadala sa Tuburan District Hospital gumikan sa samad sa iyang tiyan.

Apan sumala pa ni Espina nga gumikan sa grabeng samad sa tiyan, gibalhin si Hermoso sa Vicente Sotto Memorial Medical Center apan ang drayber sa ambulansya mihunong sa buhatan sa kapolisan ug nagpahibawo nga duna’y biktima sa dunggab nga nahitabo sa Danao.

Pagsubay sa kapolisan nasayran nga ang giingong biktima sa dunggab mao diay ang gipangita nila nga suspek sa kamatayun ni Largo.

Ang kapolisan na sa Danao ang nikuyog kang Hermoso padulong sa tambalanan sa dakbayan sa Sugbo.

Nasuta nga dunay pending warrant of arrest sa kasong murder ang suspetado diin matud ni Espina nga posibleng madugangan ang iyang kaso tungod sa kamatayun ni Largo.

Nakuha sa kapolisan ang 16 ka pulgadas nga kutsilyo nga nabulit pa sa duga nga gituohang gigamit sa pagluba sa suspetsado.

Nagpadayon pa ang imbestigasyon sa kapolisan sa Danao kung unsa gyud ang motibo sa krimen apan daku ang pagduda sa kapolisan nga posibleng duna na’y bikil kaniadto ang tulo ug subli lang nagka-initay sa maong panghitabo. (BANAT NEWS)