Naapil sa drug watch list napusilan
CEBU, Philippines - Nasikop ug napulisan pa sa paa sa kapulisan sa lungsod sa Medillen ang usa ka lalaki nga naapil sa “watch list” sa ilegal nga drugas sa maong lungsod , human kini giingong misulay og sukol kagahapon sa hapon diha sa Sitio Mojon, Barangay Kawit sa maong lungsod.
Ang dinakpan naila nga si Jerson Lucero, 25, nagpuyo ra ‘sab sa maong lugar nga gipasanginlan usab nga pirmeng magpabuto og armas. Matud pa ni Chief Inspector Fructouso Lim Jr., ang hepe sa Medillen Police Station nga human nabantayan sa kapulisan sa maong lungsod si Lucero nga sakay sa iyang motor paingon sa Barangay Kawit, dali kini gisundan nila ni PO2 Renato Nugas ug PO1 Amul Usares tungod sa pagduda nga aduna kini ilegal nga himoon. Apan pag-abot sa maong lugar, mihunong si Lucero gumikan iyang gitabangan ang usa ka bata nga ila ra sab nga silingan nga matud pa nag-ayo sa biseklita niini nga naguba.
Sumala pa ni Lim, dihang giduol kini sa duha ka polis nakabantay si Lucero ug mibunot sa iyang dala nga armas apan nakauna og pusil si PO1 Usares sa paa niini.
Nakuha gikan ni Lucero ang usa ka .45 kalibreng pistola nga dunay lima ka bala, duha ka medium size ug duha ka gagmay nga pakete nga may sulod nga gituohang shabu. Gidala sa Verallo District Hospital si Lucero ug human kini natambalan gidiretso kini og paslak sa detention cell. Kasong paghupot sa ilegal nga drugas ug armas ang atubangon sa dinakpan karong adlawa. (BANAT NEWS)
- Latest