Nagsunog sa kaugalingon

CEBU, Philippines - Duha ang patay sa duha ka managlahing hitabo sa paghikog sa probinsya sa Sugbo kagahapong adlawa, usa kanila nagsunog sa iyang kaugalingon samtang ang usa naghikog kay wa na kaagwanta sa pagsige og yawit sa asawa nga wa siya’y trabaho.

Diha sa siyudad sa Carcar nagsunog sa iyang kaugalingon ug namatay ang 47-anyos nga si Roger Gemuta nga nanguha ug gitapok ang uga nga kugon ug lukay sa lubi  diha sa usa ka luna sa sitio Upper Taclob, Barangay Napo.

Gikatahong nipahimutang kini sa sulod sa tinapok nga uga nga sagbot ug lukay dayong duslit niini. Si Gemuta nga usa ka ulitawo ug nagpuyo sa Sitio Lomboy sa maong barangay, matud ni PO2 Allan Villasorda sa Carcar Police Station sa Banat News, ulahi  kining nakita sa iyang mga paryente nga mitungas sa bukid  tungod kay duna man kini mga binuhi nga kanding.

Apan nagabin-an nalang wala pa kini mabalik hinungdan nga giapas kini sa pag-umangkon nga si Jonathan Gerandoy.

Nakurat nalang si Gerandoy nga ang iyang uyoan miduslit sa iyang kaugalingon ug tungod kay uga ang mga gitapok nga kugon ug lukay dali kining misilaob sa tibuok lawas ni Gemuta. Daling mibalik sa ilang dapit si Gerandoy ug nangayo og tabang  apan sa ilang pag-abot sunog na kaayo ang lawas sa uyoan ug wala nay kinabuhi.

Base sa imbestigasyon sa kapulisan nakabantay ang pamilya niini nga duna kini  problema apan wa motug-an kanila.

Samtang sa lungsod sa Aloguinsan, patay na nga naabtan sa iyang asawa ug anak ang ilang padre de pamilya human kini nagbitik sa iyang liog gamit ang pisi sa ilang balay sa usa ka barangay sa Aloguinsan.

Ang 37-anyos nga nagpakamatay (pangalan gipugngan sa Banat News), wala’y trabaho nga nagpuyo ra sab sa maong lugar. Matud pa PO3 Vincent Alquiza sa Aloguinsan Police Station nga nahinabi sa Banat News nga base sa ilang nakuha nga impormasyon kanuna’y lang kasab-an ug yawyawan sa asawa ang naghikog kay wala kini trabaho.

Sumala pa ni Alquiza nga dunay mga higayon nga kasab-an kini sa iyang asawa atubangan sa daghang tawo ug igo nalang kini sa pagtalikod ug mopauli sa ilang balay.

Dugang pa ni Alquiza nga hasta pa gani ang mga anak  ug ginikanan niini wala na sab motagad niini hinungdan nga kanunay na kini nga mag-inusara ug magul-anon. Sabado sa buntag sa dihang milakaw ang iyang asawa ug mga anak aron mutambong og kasal apan sa ilang pagbalik sa ilang panimalay maoy misugat sa ilang mata ang nagbitay na nga padre de pamilya. Matud pa ni Alquiza nga ang asawa sa namatay mitug-an nga wala g’yud kini nagdahom nga mosangpot sa pagpakamatay sa iyang bana ang iyang pagsige og yawyaw. “Wala na g’yud siguro ‘to siya nakaagwanta sa pirme nga yawyaw, plus dili na pud siya tagdon sa iyang mga anak, napuno na g’yud ba,” matud pa ni Alquiza. (BANAT NEWS)