Sakyanan sa gobiyerno apilon og dakop

CEBU, Philippines - Giklaro sa kadagkoan sa Land Transportation Office nga ang mga drayber sa mga sakyanan sa gobiyerno apilon nila’g dakop kun masakpan nga hanap ug dili na mabasa ang iyang plate numbers.

Matud ni LTO-7 regional director Arnel Tancinco nga ilang multahan og ‘tag P5 mil ang mga opisyal sa barangay, lungsod, siyudad ug national government agencies kun ang ilang sakyanan masakpan nga dili na klaro ang plate numbers.

Kini ilabi na og ang drayber o ang opisyal sa gobiyerno mo-tamper sa plate numbers sa sakyanan pinaagi sa pagpintal og puti aron dili dayon mailhan nga iya kini sa kagamhanan.

Si Tancinco miingon nga obligasyon sa mga opisyal sa gobiyerno nga molukat og duplicate plate numbers sa ilang mga sakyanan aron ilisan ang karaan ug hanap na nga plate numbers, ilabi na kun kini nagutay-gutay na.

Gitug-an ni Tancinco nga daghan sa mga sakyanan sa kagamhanan nga wala dayon i-renew sa mga tagdumala sa opisina ang mga rehestro apan padayon kini nga gipadagan. Sa hugot nga pagpatuman karon sa mga lagda sa trapiko, si Tancinco niingon nga ang LTO        wala’y pasayloon. "Atong klarohon no, wala’y exemption ang government offices," matud ni Tancinco.  (BANAT NEWS)