Hain na ang hustisya!!!

CEBU, Philippines - Mga kabanay sa biktima sa pagkalunod sa M/V Princess of the Stars padayon gihapon nga nanawagan og hustisya.

Ilang gihandom ang kamatayon sa ilang mga kabanay kaniadto’ng Hunyo 21, 2008 diha nga nalunod ang barko nga ilang gisakyan didto sa kadagatan sa Romblon.

Dul-an sa 40 ka kabanay sa mga biktima nga gikan pa sa nagkalain-laing dapit sa nasud ang naghugpong dinhi sa Sugbo.

Una nga gihimo sa grupo mao ang paghalad og mga pag-ampo sa Cebu Metropolitan Cathedral dayon sila miadto sa Malacañang sa Sugbo diin nagdagkot sila og kandila ug naghalad og buwak agig paghandom sa 6th Death Anniversary sa mga  biktima.

Si Lorna Goyenecha kinsa namatyan og anak atol sa hitabo miingon nga bisan og pila na ka tuig ang nakalabay apan alang kaniya lab-as pa kaayo sa iyang panumduman ang nahitabo ug hangtod karon sakit ug lisod gihapon makalimtan.

Gitataw ni Goyenecha nga hustisya ang ilang gipangayo may labot sa nahitabo sa iyang anak nga 20-anyos pa lang niadto’ng higayona pagkalunod sa barko.

Ang tigpamaba sa grupo nga si Levy Samuele nga namatyan og pag-umangkon ug ig-agaw mibutyag nga nagkaanam-anam og katibuwaag ang ilang grupo apan awhag niya nga ipadayon gayud nila ang kaso kay ila na man kining nasugdan sulod na sa unom ka       tuig.

Matud ni Samuele nga sila’ng tanan nagtinguha nga makakab-ot og hustisya ug financial assistance gikan sa Sulpicio Lines tungod kay dili lalim ang mabiyaan og minahal sa kinabuhi.

Sa pagkakaron ang paghusay sa mao nga kaso napahunong human nga ang Palace of Justice naguba ug ang mga huwes mibalhin didto sa Quimonda Building.  (BANAT NEWS)