Lalaki gipatay sud sa iyang balay
CEBU, Philippines - Patay na nga napalgan ang usa ka 41-anyos nga lalaki ug naligo sa kaugalingong dugo sud sa iyang panimalay sa Sitio Pailob, Barangay Sambag 2, dakbayan sa Sugbo kagahapon sa kaadlawon.
Giila ang biktima nga si Samuel Amance alyas "Samboy", 41 , residente ra usab sa maong lugar. Base sa inisyal nga imbestigasyon sa kapulisan sa Homicide Section sa Cebu City Police Office ang igsuon sa biktima nga si Danilo Amance nakadungog og buto-buto sa armas pasado alas- 9 sa gabii sa miaging adlaw.
Matud ni SPO4 Rey Cuyos dihang miabot sila sa crime scene nag-ubo ang biktima sa iyang higdaanan ug nigahi na ug gihulmigas.
Nakita sa kapulisan nga dunay daghang samad-pinusilan sa iyang lawas ang biktima nga gituohang maoy hinungdan sa iyang kamatayon.
Si SPO4 Cuyos midugang nga dunay posibilidad nga kaila ra sa biktima ang mihimo sa krimen tungod hapsay ra ang gamit sa sud sa balay ug matud pa ang mga silingan walay nadunggang komosyon.
Nakakuha og impormasyon ang kapulisan nga giingong tiggamitan og ginadiling drugas ang biktima ug nakakuha usab sila og empty sachet sa gituohang shabu ug drug paraphernalia diha sa iyang balay ug kini maoy usa sa gitan-aw nga anggulo sa kapulisan may labot sa kremin. Nakuha sa crime scene ang duha ka basiyo sa kalibre .45. ug laing duha ug usa ka slug sa .9mm nga bala. (BANAT NEWS)
- Latest
