Wanted sa Siquijor nasikop: Taxi drayber gitulis

CEBU, Philippines - Wala magdahum ang usa ka taxi drayber nga tulisan diay ang misakay kaniya nga tulo ka desenteng pasahero pasado alas 3 sa kadlawon sa Nasipit, Talamban, dakbayan sa Sugbo.

Ang drayber sa taxi mao si Hector Genobiagon, 49, minyo ug nagpuyo sa Urgello, Barangay Sambag I, sa maong dakbayan.

Matud ni PO1 Alsendor Suico sa Talamban Police Station nga nahinabi sa Banat News nga gikan sa IT Park misakay ang tulo ka mga lalaki ug nagpahatud sa Talamban.

Ang tulo nagsul-ob og polo shirt, karsones, dato-on ang porma ug dili gyud kadudahan nga mga tulisan.

Apan pag-abot sa maong lugar, kalit lang mideklara og tulis ang tulo ug wala’y nahimo ang drayber human gitionan kini og .45 caliber sa pasahero nga naglingkod sa atubangan. Nakuha sa mga tulisan ang kinitaan sa biktima nga P1,700 ug giapil pa ang iyang cellphone.

Gisuwayan pagpakita sa mga polis ang mga hulagway sa mga notadong tulisan sa maong lugar apan wala’y mihaom sa iyang nakita.

Sumala pa ni Suico nga taud-taud na nga nawala ang mga pagpanulis sa mga taxi drayber sa ilang lugar.

Usa sa mga gisubay karon sa kapolisan kung lahi ba nga grupo ang naglihok sa pagkakaron o kaha mao ra gihapon nga grupo ang mibalik na usab sa ilang kalihukan. (/GMR)(BANAT NEWS)