90 brgy. workers sa Sambag 1 way sweldo
CEBU, Philippines - Kapin 90 ka mga empleyado sa Barangay Sambag 1 ning dakbayan sa Sugbo lakip na ang opisyales niini wala pa makadawat sa ilang sweldo sud na sa tulo ka buwan ug naputlan na usab sila og kuryente.
Gibasol ni Barangay Kapitan Lemar Alcover ang wala pag-uyon sa mga konsehal sa appointment ni Connie Abella, ang bag-ong barangay treasurer nga iyang gitudlo mao nga dili sila makapagawas og kwarta.
“Wala nay kuryente ang gym, ang Health Center ug ang Day Care Center. Ang mga tambal sa Health center gipangbalhin lang una. Ang mga bata nagklase gawas na sa eskwelahan,” matud ni Alcover sa Banat News.
Si Abella maoy gihulip kang Filomena Chuntik kinsa gitaktak ni Alcover gumikan sa conflict of interest.
“Naapil siya sa kaso nga akong gipasaka sa Office of the Ombudsman-Visayas kabahin sa dental chair, so, duna na gyu’y conflict of interest. Matud pa kinahanglan naay confidence and trust ang kapitan sa iyang mga sakop,” matud niya.
Ang pagtaktak kang Chuntik naabot na sa Department of Interior and Local Government (DILG) ug Office of the Ombudsman-Visayas apan ang duha ka buhatan pulos nag-ingon nga walay kalapasan nga nahitabo dihang gitangtang si Chuntik.
Matud usab niya dunay duha lamang nga konsehales ang nipirma sa resolution pag-uyon sa appointment ni Abella samtang lima usab ang wala mopirma. (/EIM)(BANAT NEWS)
- Latest
