Pito sikop sa Tanke raid

CEBU, Philippines - Human sa mga barangay sa Cebu City ug Mandaue City nga naila na kaayong gihugpaan sa ilegal nga drugas, gitutukan na usab sa kapolisan ang dakbayan sa Talisay sa ilang regionwide crackdown batok ilegal nga drugas.

Kapin tunga sa milyon ka pesos nga illegal nga drugas, drug paraphernalia ug ilegal gambling machines ang nasakmit samtang pito ka mga suspek ang nadakpan sa gipahigayon nga joint operation sa nagkadaiyang operating units sa Cebu Provincial Police Office sa Barangay Tanke, Talisay City niadtong Huwebes sa udto. Upat sa mga nadakpan subject sa search warrants ug ang tulo anaa sa watchlist sa Provincial Intelligence Branch.

Ang operasyon gihimo inabagan sa Regional Anti-Illegal Drugs Operation Task Group, Regional Special Operations Group, Regional Public Safety Battalion ug sa Cebu Provincial Police Office.

Nasikop sila si Marissa Obrero; Gloria Bazar, Rhoda Obrero; ug Hazel Daan, pulos taga Barangay Tangke, kinsa subject sa search warrants nga giluwatan ni Regional Trial Court Judge Gilbert Moises sa Branch 18.

Nakuha gikan kanila ang pito ka dagko, lima ka medium ug 26 ka gagmay’ng pakete sa shabu, nagkadaiyang drug paraphernalia, ug duha ka functional video karera machines.

Nadakpan usab ang tulo nga anaa sa drug watchlist nga sila si Mesael Orapa, Albert Calapas ug Jobino Daan Bazar.

Matud ni Senior Superintendent Noel Gillamac, CPPO director, nga ang tanan nga nasikop pulos babaye kay ang mga lalaking pushers kaniadto mi-lie low na human mangasikop. Mibalik sila sa pagpamaligya apan ang ilang mga asawa na maoy frontline. “Not nga babaye di sila mosuyop, some of the personalities behind were arrested before one of them has a pending warrant of arrest that is why di na kaayo siya visible…so the one doing the transaction is a woman,” sigon ni Gillamac.

Samtang sa Sitio Soong, Barangay Mactan, dakbayan sa Lapu-Lapu  nadakpan ang usa ka Herman Dinawanao Malingin alyas Ining, 47, nga nagpuyo sa maong dapit.

Nakuha gikan kaniya ang 365 ka paketeng gituohang shabu, usa ka KG- 9 submachine pistol, usa ka magazine nga may 12 ka  bala, usa ka rifle grenade ug mga shabu paraphernalia.

Si Malingin nadakpan sa grupo saCity Intelligence Branch sa Lapu-Lapu City Police Office (LCPO)  pinangulohan ni Senior Inspector Rogelio Pineda pinasikad sa search warrant nga giluwatan ni Judge Toribio Quiwag sa Branch 27 sa Regional Trial Court (RTC) 7.

Sa laing bahin, gimando ni Cebu City Mayor Mike Rama kang Senior Superintendent Noli Romana, hepe sa Cebu City Police Office nga pangitaon ug ilhon gyud ang “polis” nga anaa sa bluebook nga na-recover sa drug den sa barangay Pasil sa miaging adlaw.  ( Ria Mae Y. Booc ug report nila ni Jojo Ugdol, Romeo Limpangog ug  Khacel Anne Sanchez USJR Intern/EIM)