Rama, mga opisyales gikiha ngadto sa Malacañang

CEBU, Philippines - Gipasakaan og reklamo ang mga kadagkoan sa siyudad sa Sugbo lakip na ang mayor, bise mayor ug dose ka konsehal kalabot sa giingong “illegal” nga paghatag og P20,000 sa mga empleyado sa City government isip calamity assistance. i Mayor Michael Rama, Bise Mayor Edgardo Labella, ug mga konsehal nga silang Nestor Archival, Sr., Mary Ann delos Santos, David Tumulak, Nendell Hanz Abella, Sisinio Andales, Alvin Arcilla, Roberto Cabarrubias, Ma. Nida Cabrera, Gerardo Carillo, Alvin Dizon, Eugenio Gabuya, Jr., ug Noel Eleuterio Wenceslao ang gipasakaan og reklamo ni Atty. Reymelio Delute.

Wala giapil sa kiha silang Konsehal Margarita Osmeña ug Leah Japson nga giingong wala modawat sa calamity assistance fund. Wala sab maapil silang Konsehal James Cuenco, Richie Osmeña, ug Phillip Zafra. Gipasaka ang kasong grave misconduct and abuse of authority  sa Office of the President nga posibleng makasuspenso sa mga opisyales sa tulo ka buwan kun mapamatud-an nga “illegal” nga paghatag og kwarta sa mga empleyado.

Wala nabalaka ang Mayor tungod matud pa, wala kini nila kawata. Sigon niya nga gigahin g’yud ang kwarta para sa mga empleyado. Misalig siya nga  matinud-anong resolbahon sa Presidente ang maong reklamo.

Si Delute, miyembro sa Bando Osmeña-Pundok Kauswagan (BOPK) kinsa milansar og kapitan sa Basak-San Nicolas nga napildi ni Barangay  Kapitan George Rama nga ig-agaw sa mayor.

Matud niya, nananghid siya ug gitugotan ni kanhi mayor Tomas Osmeña, kinsa amahan sa BOPK, sa iyang pagpasaka og reklamo apan giinsister niya nga wala siya sugoa niini. Mitug-an siya nga wala sila’y personal nga relasyon ni Osmeña ug sa pagduda nga “politically motivated” ang iyang pagpasaka sa kaso apan matud niya nga anaa g’yuy legal basis ang iyang reklamo.

Matud ni Atty. Jose Daluz III, kinsa executive assistant ni Rama   nga maayo ang “strategy” sa complainant kay midiretso sa opisina sa Presidente kaalyado sa BOPK. Si Osmeña sakop sa Liberal Party ni Presidente nga Benigno Aquino III.  Ang Commission on Audit (COA) daan nang mipasidaan bahin sa maong calamity assistance fund tungod kay kalapasan kini sa balaod.

Si Konsehal Margot Osmeña sa dihang gipangutana kun andam ba siyang molingkod sa posisyon sa mayor kun masuspenso si Rama.  “Oh my God,” kini maoy tubag sa konsehal sa Banat News.  (BANAT NEWS)