OFW gikiha
CEBU, Philippines - Gipasakaan na og kaso ang usa ka kanhi Overseas Filipino Worker nga nadakpang nagdala og KG9 nga armas sulod sa compound sa Prima Vera Subdivision sa Yati, lungsod sa Liloan.
Si Lito Apas, 32-anyos, taga Curva sa nahisgutang lungsod, nadakpan sa ilegal nga pagdala sa maong matang sa armas uban sa napulo ka bala sulod sa magazine niini.
Matud ni PO3 Jesson Gayo sa Liloan Police Station nga wala’y dokumentong gikapakita si Apas sa maong armas hinungdan nga ilang gidakop.
Gawas sa kalapasan sa paghupot og armas nga wala’y lisensiya, gi-imbargo usab sa kapolisan ang Honda nga motorsiklo nga giluwanan ni Apas tungod kay duha ang plate number nga gitaud niini.
Si Gayo miingon nga unang nadawat ang taho sa ilang buhatan labot sa armadong lalaki nga nagsuroy-suroy sa maong dapit.
Ang dinakpan miingon nga dili tawo ang iyang pusilon kun dili gitagana kini niya isip bunal sa mga iro nga mopaghot kaniya matag labay sa maong lugar. (BANAT NEWS)
- Latest
