150 ka awa gisakmit

CEBU, Philippines - Kapin sa 150 ka isdang awa ang gisakmit sa Cebu City Bantay Dagat Task Force sa gipahigayong monitoring sa Pasil Fish Market kagahapon.

Si Ranulfo Sebusa, hepe sa task force miingon nga usa ka fishing vessel ang midunggo sa Pasil Fish Market nga may sulod kapin sa 150 ka buok awa o giant bangus.

Gikan sa Bohol ang  maong fishing vessel apan wala’y niangkon nga tag-iya atol sa pagdakop.

Matud ni Sebusa nga ang mga nasakmit nga awa gihatag sa mga charitable institutions aron mapuslan.

Ang awa giprotektahan gikan sa mga mananagat tungod kay sila ang maghimo og similya sa bangus nga maoy mahimong kuhaon.

Ubos sa balaud, ang masakpang manakop og awa mahimong mapriso og unom ka buwan ug usa ka adlaw hangtud sa walo ka tuig ug makamulta og P80 mil.

Mahimo usab nga makuhaan og lisensya sa pagpanagat ang bisan kinsa nga masakpan. (USJ-R Masscom Intern/GMR) (BANAT NEWS)