Napilde sa pusta sa PBA nanunggab
CEBU, Philippines - Kritikal ang usa ka lalaki human dunggaba sa iyang kauban sa trabaho kinsa napilde sa pustahanay sa duwa sa Philippine Basketball Association (PBA).
Ang insidente nahitabo pasado alas 10 sa buntag sa may One Pavillion Place, Banawa, dakbayan sa Sugbo.
Ang biktima mao si Raymond Manceras, 19, ulitawo, assistant plumber sa One Pavillion Place ug nagpuyo sa maong lugar samtang ang suspetsado giila nga si Richard Banguiran, 25, ulitawo, electrician sa maong edipisyo ug nagpuyo sa barangay Lahug.
Matud ni PO1 Michael Angelo Singson sa Homicide Section sa Cebu City Police Office nga nahinabi sa Banat News nga human sa duwa sa semi-final sa PBA, napilde ang suspek sa iyang gipustahan og P100 nga team.
Sa dihang misulod na sa iyang trabaho, gipaningil ang suspek sa iyang kauban apan wala mohatag sa bayad.
Gumikan kay wala mobayad, giingnan sa biktima nga dili na makigpustahanay sa sunod sanglit dili man mobayad kung mapilde.
Wala kabantay ang biktima nga mikuha na diay og icepick ang suspek ug gidunggab ang iyang kilid ug milapos sa gusok hinungdan nga dali siyang gidala sa Vicente Sotto Memorial Medical Center (VSMMC) samtang dali usab nga misibat ang suspek. (BANAT NEWS)
- Latest
