Gitipdas sa CPDRC miabot og 60 ka inmates

CEBU, Philippines - Mikabat na ngadto sa 60 ka kaso sa tipdas ang natala sa Cebu Provincial Detention and Rehabilitation Center sukad niadtong Hunyo 9 hangtod kagahapon. Matud sa CPDRC warden nga si Romeo Manansala nga 36 ka mga piniriso ang anaa pa karon sa isolation room aron malikayan ang pagkuyanap sa tipdas samtang 24  na ang nangaayo.

Niadtong adlaw’ng Huwebes sa pagbisita sa Banat News sa maong prisohan, aduna pay 43 ka kaso sa tipdas. Matud pang Manansala basta adunay inmate nga nagpakita og sintomas sa tipdas ilaha dayon kining gibutang sa isolation room aron paglikay nga matakdan ang ubang piniriso.

“Naa nay gipanghilantan pa. Gi-isolate na lang namo daan. Wa na mi naghuwat nga naa nay manurok,” matud niya sa pakighinabi sa Banat News.

Niadtong miaging semana, gimandoan sa Regional Epidemiology Surveillance Unit-7 ang nagdumala sa CPDRC nga dili usa tugotan ang mga bisita nga adunay sakit sama sa ubo, hilanat ug sip-on nga mosulod sa maong pasilidad, gidili na usab ang pagduaw sa mga bata. (BANAT NEWS)