Papa sa masuso mi-deny

CEBU, Philippines - Kusganong gihimakak sa amahan sa masuso nga giplasteran ang baba, ang report nga nakig-areglo na sila sa Cebu Puericulture Maternity House Inc. ug mipadayag nga way presyo ang ilang integridad.

Kini samtang kagahapon, gipagawas na sa Inter-Agency Task Force ang resulta sa ilang imbestigasyon ug girekomendar nga pasakaan og kasong civil, criminal ug o ba kaha administratiba ang tambalanan.

Sumala pa sa gi-post nga findings sa task force nga gipatik sa Facebook page sa sibyaanang DyLA, unom ka violations ang nahimo sa Chief Nurse, duha ka nurse ug on-duty nga midwife. Naglakip niini ang wa pag-atiman og tarong sa masuso nga gi-plasteran, wala pagsumitir og incident report, wa pag-anticipate sa posibleng epekto sa pagbutang og  plaster sa baba sa masuso, wa pag-turnover sa pacifier nga nakit-an sa nursery o bisan na lang pagbutang niini sa report ug ang tuyo nga wala pagpahibalo sa ilang kadagkoan bahin sa insidente.

Samtang nakita usab sa task force nga dunay kalapasan ang tambalanan tungod sa wala pagtuman sa ratio nga usa ka nurse sa matag unom ka masuso kay  matud pa duha lang ka nurse sa matag 28 ka masuso ang nag-duty nianang tungora.

Wa usab mosunod sa “10 steps on successful breastfeeding policy,” wala pagtuman sa ‘no pacifier policy’ nga maoy adbokasiya sa usa ka mother and child friendly hospital, command responsibility, wa pag-monitor kun natuman ba ang standard operating procedure, kakulang sa seguridad ilabi na sa SICU ug kapakyas sa pag-imbestigar sa mga nurse nga nalambigit sa insidente kay misalig lang sa verbal report sa nurse.

Si Atty. Dante Jadman mibutyag nga dili maapektahan ang ilang resolusyon  nga nag-rekomendar nga pasakaan og kasong civil, criminal ug administratiba ang tambalanan, apan mag-agad gihapon kini sa mga ginikanan sa bata kun mopasaka sila og kaso.

Ang amahan sa masuso nga si Ryan Noval nagkanayon nga ipuno nila ang maong pangangkon sa maong tambalanan sa kaso nga ilang ipasaka.

Mitug-an hinuon ang amahan nga dunay gipirmahan si Badocdoc nga dukomento apan dili kini mao ang gipakatap sa abogado sa maternity hospital. Midumili siya paghatag og impormasyon sa giingong gipirmahan ni Badocdoc tungod wala pa nila nakaestorya ang ilang abogado.

Saysay ni Noval sa iyang Facebook account kagahapon nga dili mapalit ilang integridad ug ang ilang respeto sa ilang kaugalingon.

“Try again to derail the truth, YOU CANNOT AFFORD TO PAY US for our integrity, self respect and principles,” matud ni Noval sa iyang Facebook account.

Gani, matud niya nga disturbing ang mibaha nga balita kagahapon nga nabayran sila. Apan, miingon siya nga wala g’yud sila nakig-areglo sa maong hospital.

Dugang niya nga gilipat ra sa maternity ang isyu ilabi na hapit na ipagawas sa inter-agency ang ilang resolusyon kabahin sa mga violations nga nakalambigit sa pagtaptap sa baba sa ilang anak. Una niini, gipahibawo sa Department of Health (DOH-7) nga nakadawat  sila og suwat gikan sa Cebu Puericulture Maternity House Inc.  nga giingong nakig-areglo na si Jasmine Badocdoc kanila.

Si Badocdoc maoy inahan ni Baby Yohannes kansang baba giingong giplasteran sa nurse sa maong tambalanan.

Matud ni Atty. Madyll Robinta, legal counsel sa DOH-7 nga ang suwat nga settlement of dispute dunay pirma ni Jasmine Badocdoc ug ni Florencia Streegan sa maternity hospital.

Giklaro hinuon sa DOH-7 dili pa nila makompirmar ang maong suwat ug ilang i-verify kun si Badocdoc ba gyud ang mipirma sa maong dokumento.

Si Badocdoc sa iyang bahin miadto sa buhatan sa CHR-7 human mahibaw kalabot sa suwat nga giingong nakig-settle kini sa tambalanan.

Wa mohimakak ug wala usab moangkon si Badocdoc kun iya ba kadto nga pirma sa dokumento. Matud niya di una sila mohatag og komento tungod sa “gag order” sa ilang abogado.

Samtang ang Commission on Human Rights miingon nga bisan paman sa maong suwat dili mausab ang resulta sa ilang gihimong imbestigasyon.   (BANAT NEWS)