Mag-uuma gipatay sa pildero sa hantak
CEBU, Philippines - Patay ang usa ka 34-anyos nga mag-uuma human gipusil sa usa ka ex- convict nga napildi sa hantak diha sa Sitio Pantag, Barangay Cerdena, Malabuyoc pasado ala 6:00 sa gabii miaging Domingo.
And biktima giila nga si Doretio Baranggan Ababa, lumolupyo sa Barangay Malolos, Barili nagpuyo sa maong lugar nakaangkon og samad pinusilan sa dughan human gipusil sa suspek nga si Domingo Cabugwas, 51,ug taga Sitio Kaloktogan sa pareho nga barangay.
Matud ni SPO2 Mario Paler, team leader sa alert team, nga ang biktima kauban ang bilas nga babaye, Elizabeth ug ang inahan sa biktima nga si Eleoteria Cardente Devalgue nga mitambong og birthday party sa ilang silingan. Giagda ni Elizabeth si Ababa nga naghantak kauban ang suspek apan wala misugot ang suspek tungod kay gusto pa niini nga makabawi sa iyang pildi.
“Kaning suspect man gud pildiro sa hantak maong di siya mosugot papaulion ang biktima, kaning si Elizabeth wa man musugot pud hinungdan nga gisukmag siya sa suspect,” dugang ni Paler. Tungod niini milaban ang biktima sa iyang bilas ug mikuha og piko ug gihapsan ang suspek kinsa natapsingan. Miuli dayon ang biktima sa ilaha apan misunod diay ang suspek sa ilang balay ug gisaka kini dayon gipusil.
Nakuha sa kapolisan ang basiyo sa shotgun sa crime scene samtang nakaikyas ang suspek.Nasayran nga napriso na kaniadto sa National Bilibid Prison ang suspek tungod sa kasong pagpatay. (BANAT NEWS)
- Latest
