Talisay nangandam sa katalagman

CEBU, Philippines - Gimandoan ni Talisay City Mayor Johnny De los Reyes ang Local Disaster Risk Reduction and Management Office nga mohimo og lakang sa pagpangandam sa posibleng pagtumaw sa katalagman panahon sa ting-uwan.

Nabalaka si De los Reyes nga dunay mahitabong pagdahili sa yuta sa mga bukirang barangay ug ang pagsanap sa tubig diha sa mga lupa nga bahin.

Matud ni De los Reyes nga kinahanglang andam kanunay ang siyudad batok sa mga katalagman aron wala’y dakung kadaut nga mahitabo ug malikayan nga dunay kinabuhing makalas.

Ang hepe sa LDRRMO, Vincie Monterde, kinsa mao usab ang Public Information Officer (PIO) sa dakbayan sa Talisay miingon nga kanunay nilang gi-monitor ang mga barangay nga gideklarar sa Mines and Geosciences Bureau (MGB) nga landslide ug flood prone areas.

Gawas niini gipa-activate usab ang Barangay Disaster Risk Reduction and Management Office (BDRRMO) sa kabarangayan.

Gisusi usab sa LDRRMO ang gidaghanon sa mga residente sa kabarangayan ug kung duna bay mga evacuation center nga giandam ang barangay sa posibleng pagtumaw sa katalagman.

Sa laing bahin, nisiaw ang pagpanghakot sa bas ug graba sa sapa sa Mananga.

Nabantayan sa mga sakop sa LDRRMO ang mga sinakong bas ug graba diha daplin sa karsada sa barangay Lagtang.

Ang ubang molupyo sa lugar mibutyag nga gikan sa sapa sa Mananga ang maong mga bas ug graba ug giingong dunay mga multicab nga mohakot niini ug ipamaligya. (BANAT NEWS)