Napusilan kasohan

CEBU, Philippines - Kasong frustrated murder ang ipasaka batok sa suspetsado sa pagpamusil nga napusilan usab sa kapolisan sa sitio Matumbo, Pusok, dakbayan sa Lapu-Lapu niadtong Biyernes.

Si Marvin Villanueva, 30, nagpuyo sa maong dapit ang gitumbok nga mipusil kang Marvin Ybañez, 29, taga sitio Gabi, Gun-ob sa maong dakbayan.

Si Senior Insp. Junnel Caadlawon, hepe sa Presinto 5 sa Lapu-Lapu City Police Office (LLCPO), miingon nga samtang nagsusi si Ybañez sa iyang naabiriyang motorsiklo, kalit siyang giduol sa grupo ni Villanueva ug gitionan og armas.

Nidagan si Ybañez apan gigukod kini ug gipusil sa suspetsado apan wala maigo. Si PO3 Joseph Mumar sa City Intelligence Branch  sa LLCPO nga nahi-agi sa lugar daling nanaug sa sakyanan ug nagpailang polis dungan ang pagmando sa pagbutang sa gidalang armas sa suspetsado.

Giingong wala manumbaling ang suspetsado kang Mumar ug namusil apan wala makaigo nga maoy nakaaghat sa maong polis sa pagpusil sa walang paa niini.

Ang kauban sa suspetsado nga nailhang si Gerald Zosobrado mibawos unta sa pagpusil kang Mumar ginamit ang pugakhang apan wala sad makaigo hangtud nga nahidangat sa maong lugar ang mga sakop sa Special Weapons and Tactics (SWAT). Nadakpan si Villanueva nga nagtago sa usa ka panimalay sa maong dapit ug nasakmit gikan kaniya ang .357 revolver nga adunay lima ka bala. (BANAT NEWS)