Mga polis sa Mandaue pabiseklitahon

CEBU, Philippines - Hingpit karon nga gipatuman ang police visibility sa dakbayan sa Mandaue.

Gawas sa beat police ug mobile patrol, gidasig ni Senior Supt. Petronelli Baldebrin, direktor sa Mandaue City Police Office (MCPO), ang iyang mga sakop sa pagsakay og biseklita.

Gipasabot niya nga ang ilang pagsakay og biseklita libot sa kabarangayan maoy silbing ehersisyo sa matag adlaw nga kaniadto sagad nilang gihimo mao ang pag-jogging.

Dugang pa niya nga ang ilang pag-ehersiyo nga magsakay og biseklita ilang gitumong sa pagpakita sa katawhan nga aktibo sila nga nagpatuman sa kahapsay ug kalinaw sa dakbayan.

Matud niya nga may mga higayon nga manghunong sila sa usa ka lugar sa pag-aninaw sa palibot ug makighinabi sa mga molupyo.

Si Baldebrin miingon nga ang maong paagi sa ehersisyo ilang  gihimo dili lang sa pagbaton sa kalagsik sa panglawas sa kapolisan sa dakbayan kun dili lakip na usab niini ang pagpaduol nila ngadto sa katawhan. (BANAT NEWS)