Osmeña pamultahon tungod sa basura

CEBU, Philippines - Nangreklamo ang mga opisyal sa barangay Labangon, dakbayan sa Sugbo kay usa sa ilang sakop gi-isyuhan lang dayon og citation ticket sa mga kawani sa City Hall tungod sa wala mahipos nga basura sa karaan nila nga barangay hall.

Nagtoo ang mga opisyal sa Labangon nga ang miisyu og citation ticket ni Konsehal Ian Anthony Osmeña mga kawani sa City Environmental Sanitation Enforcement Team (CESET).

Apan ang hepe sa CESET nga si Grace Luardo miingon nga si Leonardo Abarquez nga maoy miisyu og citation ticket ni Osmeña dili sakop sa CESET.

Sa pakisusi nahibaw-an nga si Abarquez sakop sa DPS garbage monitoring team.

Si Osmeña ang giisyuhan og citation ticket kay siya man ang tsirman sa committee on environment sa konsehal sa barangay Labangon.

Ang wala magustohi sa mga opisyal sa Labangon mao nga gideritso lang og isyu’g citation ticket para ni Osmeña.

Matud ni Luardo nga sila sa CESET isyohan nila og citation ticket ang konsehal nga nagdumala sa committee on environment kun wala g’yud kini himoon nga lakang sa problema kabahin sa basura bisan og gitawag na ang ilang atensyon niini.

Sa miaging semana, usa ka konsehal sa barangay Caretta nga nagdumala sa committee on environment naisyohan na usab sa CESET og citation ticket sa mao gihapon nga rason.

Ang konsehal sa barangay Guadalupe nga nagdumala sa environmental committee napasakaan na usab og kaso sa hukmanan kay wala mobayad og multa human isyuhi og citation ticket. (Rene U. Borromeo/GMR)

DSWD nipahimangno batok ilad sa 4Ps

Gipahimangnuan sa Department of Social Welfare and Development-7 ang publiko batok sa giingong pangilad may kalabutan sa Pantawid Pamilyang Pilipino Program (4P's).

Report sa ubang rehiyon nagkanayon nga may nagpailang mga kawani sa DSWD ngadto sa mga miyembro sa 4P’s ug naningil og bayad bugti sa ilang interview uban ang garantiya nga seguro kining makasulod sa programa.

Ang DSWD nipahigayun karon og special validation para sa social pension program ug modified cash transfer aron ma-verify kun tinuod nga indigent ang kasamtangan ug bag-ong mga beneficiaries base sa ilang listahan.

Si DSWD-7 Information Officer for Pantawid Program Phoebe Jen Indino nipahibawo nga wala pa sila makadawat og report susama niini apan susihon kini sa naasoy nga buhatan.

Giklaro sa kadagkoan sa DSWD nga wala’y bayad ang interview alang sa mga miyembro sa naasoy nga programa. (BANAT NEWS)