Tinun-an wa makamata napaig sa sunog
CEBU, Philippines - Gumikan sa pagkahinanok sa pagkatulog, naapil sa pagkasunog ang usa ka 17-anyos nga estudyante niadtong nakalabay nga adlaw sa Sitio Iba-an, J. Panis Street, Barangay Banilad, Cebu City sa miaging hapon.
Giila ang biktima nga usa ka Adrian Go Tecson, kasamtangan nga nag- abang sa maong lugar, ug lumad nga taga Mibang, Santa Felomina, Dipolog City, 1st year College sa Cebu Doctors University sa kursong BS Biology.
Ang imbestigador sa Homicide Section sa Cebu City Police Office (CCPO) SPO4 Rey Cuyos nga nahinabi sa Banat News, mitug-an nga atol sa maong sunog ang mga kauban ni Tecson misulay pa unta pagpukaw niini pinaagi sa pagsipa ug pagdukdok sa pultahan sa iyang kwarto apan wala gayud kini nakamata.
Nagtoo lang ang iyang mga kauban nga wala’y tawo sulod kay wa man g’yuy mitubag.
Anha lang nabalaka og maayo ang landlady sa biktima nga si Isabelita Rosales dihang sa iyang pagsubay sa iyang mga boarders gayud niya makit-i si Tecson, hinungdan nga gipangita kini sa kabomberohan.
Pasado na alas-7 sa gabii dihang nakit-an ang lawas ni Tecson sa iyang lawak nga natabonan na og mga debris ug napaig na.
Dugang pa ni Cuyos nga ang amahan sa biktima nga nahinabi sa landlady pinaagi sa cellphone mitug-an sab nga dugay gayud nga pukawon ang iyang anak kung kini makatulog na.
Gihulagway sab ni SPO4 Cuyos nga lisod sab ablihan ang kwarto sa biktima gumikan duha ang lock niini sa sulod. (BANAT NEWS)
- Latest
