Mga sugyot sa COA wala tumana

CEBU, Philippines - Sa 32 ka reko-mendasyon sa Commission on Audit (COA) aron makorehean ang mga sayop sa pagdumala sa kagamhanan sa Talisay City kaniadtong 2012, duha pa lang ang natuman sa hingpit hangtod sa miagi’ng Disyembre.

Ang mao nga mga palpak nga gusto’ng pahimoan og kausaban sa COA nahimo atol pa sa administrasyon ni kanhi mayor ug karon konsehal na sa Talisay nga si Socrates Fernandez.

Ang rekord nagpakita nga ang administrasyon ni Mayor Johny V. Delos Reyes nakahimo na og “partial compliance” sa 15 ka rekomendasyon apan wala g’yud mohimo’g lakang sa lain pa nga 15 ka sugyot.

Base sa 2013 annual audit report, ang COA nagkanayon nga ang dakbayan sa Talisay wala’y gihimong aksyon kabahin sa pagpagawas sa P5,866,930 nga pundo ubos sa nagkalain-laing transaksyon lakip na ang transaksyon nga gigamitan og peke nga canvass documents kabahin sa pagpaayo sa mga sakyanan ug sa heavy equipment sa dakbayan.

Nasuta sa mga state auditors nga dili makiangayon sa kagamhanan sa Talisay ang paggasto sa P5.8 milyones ug maisip kini nga nakalapas sa Article 171 sa Revised Penal Code ug Section 3 (e) (g) sa Anti-Graft and Corrupt Practices Act.

Ang COA mirekomendar nga ang kagamhanan sa Talisay kinahanglang magpa-higayon og impartial investigation ug mopa-hamtang og silot sa mga personnel nga responsable sa disbursements.

Gisugyot sa COA nga ang mga tawo nga responsable sa maong kalapasan kinahanglang mouli sa “disallowed” nga kantidad.

Apan matud sa COA nga hangtod karon ang siyudad wala mogama og lakang sa daghan nila nga rekomendasyon.

Apil sa gihulagway nga kwestyonable nga gihimo sa administrasyon kaniadto ni Fernandez mao ang paggasto og P6.4 milyones nga gipanghatag isip cash incentives ngadto sa 1,231 ka job order sa siyudad.

Sa administrasyon karon ni Mayor Johnny De los Reyes gihunong na ang maong paghatag og cash incentives sa mga JO’s apan ang kantidad nga nagasto kaniadto wala pa ma-refund.

Ang kagamhanan sa Talisay nangatarongan nga maglisud sila pagkolekta sa refund tungod kay ang kontrata sa ubang mga JO wala na kini ma-renew.

Ang COA nagkanayon nga ang collection nga P10.5 milyones sa nagkalain-laing school fees sa Talisay City College atol sa kanhi administrasyon ni TCC President Tomas Ramos wala mahibaw-i kun unsay gigastohan.

Matud sa COA nga gawas sa pagkolekta og nagkalain-laing school fees, ang TCC migasto usab gikan sa ilang collections nga wala’y approval sa Board of Trustees.

Ang kontrata ni Ramos isip presidente sa TCC napupos niadtong Hunyo 2013 ug wala na kini ma-renew pa.  (BANAT NEWS)