Nadakpang hired killers ug middleman tan-awon kung apil usab sa ubang krimen

CEBU, Philippines - Ang kapolisan sa Mandaue City Police Office (MCPO) mopalawom pa sa ilang imbestigasyon sa mga nadakpan nga gun for hires, middleman ug gipasanginlang mastermind nga magpapatigayon kung dunay pay laing mga krimen nga ilang gikalambigitan.

Ang upat gipasakaan og kasong murder niadtong Biyernes sa hapon.

Si SPO3 Marcos Noval nga nahinabi sa Banat News miingon nga ang  gipasakaan og kaso mao ang duha ka gun-for-hire nga mga habal-habal drivers nga sila si Regor Salazar, 28 ug Jhonry Sabejon, alyas Jhon-jhon, 32, pulos taga Sitio Buhisan, Barangay Labangon, Dakbayan sa Sugbo.

Si Salazar maoy nagpusil patay sa biktima nga si Marlon Bantolinao nga taga Yati, Liloan ug fish vendor sa Sitio Fatima, Barangay Basak, Dakbayan sa Mandaue nga nasuta nga dili diay mao nga target.

Dugang gipasakaan og kasong murder mao sila si Giovanni Albano nga maoy nag-hire nila ni Salazar ug Sabejon ug ang giingong mikontrata kanila bugti sa bayad nga P20 mil nga negosyante nga si Victor Go Yu.

Si Yu maoy gitumbok ni Albano nga maoy nagsugo kaniya sa pag-hire og duha ka gun-for-hire. Si Yu giingong migamit og alyas sa pagpadala niya sa bayad sa pagpatay pinaagi sa usa ka pawnshop sa dalan A.S. Fortuna, Barangay Banilad, Dakbayan sa Sugbo.

Matud pa ni Noval nga dunay mga high profile killings sa Mandaue City nga ilang gisubay karon nga posibleng may koneksyon ang mga dinakpan. (BANAT NEWS)