Adik nga kawani sa City Hall gitaktak

CEBU, Philippines - Gitaktak sa trabaho ang walo sa siyam ka kawani sa City Hall nga nagpositibo sa drug test nga wala magpaubos sa  drug rehabilitation sa siyudad, samtang ang usa nga nagpa-rehabilitate mamahimong makabalik sa trabaho.

Matud ni Atty. Dominic Dino pangulo sa Human Resource Department sa City Hall nga tangtangon sa trabaho ang walo ka kawani aron sila maleksyon ug sa uban nga gustong mosulay paggamit sa ginadili nga drugas.

Dugang ni Dino nga ang mga casual employees nga nagpositibo gidiretso nga gitaktak samtang ang mga regular nga kawani mag-agi pa sa legal nga proseso una pa sila mataktak.

Gusto usab ni Cebu City Mayor Michael Rama nga ipatangtang ang mga kawani sa barangay nga nagpositibo sa drug test, kini sukwahi sa sugyot ni Dr. Alice Ultang ang pangulo sa Cebu City Office for Substance Abuse Prevention (COSAP) nga ang mga kapitan sa barangay maoy padesisyonon kung tangtangon ba o di ang mga kawaning adik. (/EIM)(BANAT NEWS)