Bantay Dagat sa Talisay pasidunggan

CEBU, Philippines - Makadawat og pasidungog gikan sa Department of Environment and Natural Resources ang Fishermen Sea and Ecological Care (FISECA) sa dakbayan sa Talisay.

Ang pagpasidungog himoon karong Hunyo 30 sa SM City Cebu atol sa pagtapos sa Environment Month Celebration.

Ang FISECA gitumbok nga usa sa kahugpungan nga aktibong nisuporta sa mga programa sa DENR sa pagpreserba sa kalikupan.

Si DENR-7 Regional Executive Director, Dr. Isabelo R. Montejo, sa iyang suwat ngadto sa pangulo sa FISECA, Gregorio dela Torre, mipahibawo nga ang grupo sa bantay dagat makadawat og “recognition award” sa ilang suporta ug kontribusyon sa mga programa sa DENR. Si  Montejo nagkanayon nga ang paghatag og pasidungog ubos kini sa seryosong commitment sa DENR sa pag-promote sa sustainable eco-friendly programs uban sa pagtabang sa pribado ug publikong sektor.

Giklaro ni Montejo nga nagkinahanglan sila og ayuda sa nagkalain-laing stakeholders sa pagpatuman sa mandato ug tumong sa pagprotekta sa kalikupan alang sa kauswagan sa kinabuhi sa matag molupyo. (/GMR)(BANAT NEWS)