Mga langyaw sa Sugbo organisahon

CEBU, Philippines - Tungod sa mga krimen nga may kalambigitan sa mga langyaw dinhi sa Sugbo, gusto sa kapulisan nga mo-organize og mga grupo sa mga langyaw nga gitawag og Foreign Nationals Keepers Network (FNKN).

Ang maong grupo ang una nang namugna sa lungsod sa Moalboal, human sa pag-igo sa bagyong Yolanda, aron mas dali ang pagpangita sa mga langyaw sa usa ka lugar panahon sa kalamidad.

Nakita nga epektibo ang maong network tungod kay dali kaayo nga ma-trace ang mga langyaw nga nagpuyo na sa maong lungsod.

Apil sab sa katuyoan   niini aron duna’y kasayuran ang lokal nga kapulisan sa matag lungsod kung pila ka langyaw ang anaa nagpuyo sa iyang lugar ug unsa sab kaayo ang mga background niini.

Matud pa ni Superintendent Rodulfo Albotra, hepe sa Provincial Intelligence Branch (PIB) nga kini ilang gusto nga ipadayon pa sa ubang lugar aron mas mapadali pa ang pagtabang sa mga langyaw ug dali ‘sab ang pagsikop sa mga pinangita sa balaod.

Gimandoan ni Albotra ang mga hepe sa mga police stations sa kalungsoran nga sugdan ang pag-organisar sa mga langyaw sa ilang mga lugar. (/EIM)(BANAT NEWS)