Bawal ang dalaw sa CPDRC tungod sa tipdas outbreak
CEBU, Philippines - Hangtod nga wala pa hingpit nga naayo sa sakit nga tipdas ang mga inmates sa Cebu Provincial Detention and Rehabilitation Center (CPDRC) did-an una ang ilang mga kabanay nga makabisita kanila.
Kini maoy gibutyag sa Department of Health (DOH-7) aron kapanalipdan ang mga kabanay sa mga inmates dili mataptan sa maong sakit.
Matud ni Dr. Jaime Bernadas ang regional director sa DOH-7 nga gawas sa CPDRC lakip sa ilang monitoron ang silingan niining prisohan nga Cebu City Jail aron di motapon ang maong sakit.
Si Dr. Renan Cimafranca sa Regional Epidemiology and Surveillance Unit (RESU-7) miingon nga posibleng gikan ang virus sa tipdas sa mga bisita o ba kaha sa mga personnel sa prisohan.
Gusto ni Cimafranca nga ang tanang mosulod sa CPDRC mag-agi una og screening kung wala ba silay sakit.
Ang tipdas sumala pa sa RESU usa ka airborne disease o makatakod pinaagi lang sa hangin. Way tambal ang tipdas apan mapugngan kini pinaagi sa bakuna sa bata pa.
Sa pagkakaron 27 na lang ka mga inmates ang padayon karon nga giatiman sa CPDRC ug nanghinaot ang DOH nga di na kini madungagan karong gibuwag na sila sa ubang mga priso. (/EIM)(BANAT NEWS)
- Latest
