Talisay SWAT wa pay uniporme
CEBU, Philippines - Kagamhanan sa dakbayan sa Talisay nagtinguha nga ma-inugurahan na nila ang Special Weapon and Tactics (SWAT) sa siyudad matud ni Talisay City Administrator John Yre De los Reyes.
Si De los Reyes nga nahinabi sa Banat News mibutyag nga niadtong Martes iyang nasayran nga wa pay uniporme ang SWAT sa kapolisan sa siyudad.
Ang Talisay duna kini walo ka miyembro sa SWAT apan wala pa silay uniporme nga giingong mokabat og P200 mil.
Gibutyag ni De los Reyes nga buot sa mayor nga palitan og usa ka bag-ong sakyanan ang SWAT apan ang hepe sa kapolisan sa siyudad nga si Superintendent Reycel Carmelo Dayon mihangyo nga mga motorsiklo lang una ang ipapalit aron makasuot-suot sila sa mga sudlonong lugar sa Talisay.
Matud ni De los Reyes nga ang budget alang sa mga motorsiklo sa SWAT posibleng ipaapil nila kini sa supplemental budget sa third quarter o karong buwan sa Hulyo niining tuiga. Si De los Reyes miingon nga ipaubos sa bidding ang pagpamalit og mga motorsiklo tungod kay daku-daku ang kantidad niining magahin. Masaligon siya nga dako og ikatabang sa kampanya batok krimen ang SWAT. (BANAT NEWS)
- Latest
