Price Monitoring Councils ipabanhaw

CEBU, Philippines - Nanawagan si Negros Occidental Gov. Alfredo Marañon Jr. sa mga lokal nga  kagamhanan sa ilang probinsiya nga banhawon ang Local Price Monitoring Councils (LPMCs).

Kini nunot sa pagtaas sa mga nanag-unang palaliton karon sa kamerkaduhan nga gituohang gipaluyohan sa mga mapahimuslanong magpapatigayun nga  nitago sa supply sa mga basic commodities aron mosaka ang presyo.

Matud ni Marañon nga ang LPMCs dali ra unya nga makahimo og tukmang aksyon sa higayon nga mamatikdan niini ang dako ug dili makatarunganong pagsaka sa presyo sa bugas ug ubang basic commodities.

Si Marañon niawhag usab sa Department of Trade and Industry (DTI) nga gukdon ang mga traders nga maoy responsable sa pagtago sa mga supply sa mga nag-unang palaliton ilabina sa bugas. Kini aron mahatagan sa tukmang silot o kaha pasakaan sa tukmang kaso sa korte.

Gipasabot ni Marañon nga angayan usab sirad-an ang mga tindahan ug mga bodega sa bugas nga wala nituman sa suggested retail price ug nagpatuyang na lang sa pagpaburot sa presyo sa ilang gipamaligyang bugas. Giawhag usab sa gobernador ang mga konsumedor nga magdaginot sa pagpamalit sa mga kinahanglanong palaliton sama sa bugas pinaagi sa pagpalit sa mas barato ug kun mahimo pilion ang NFA rice. (BANAT NEWS)