Gullas: Full-time nga presidente alang sa TCC

CEBU, Philippines - Tinguha ni Kongresista Gerald Anthony “Samsam” Gullas Jr. nga full-time sa iyang serbisyo ang matudlong sunod presidente sa Talisay City College.

Kini ang iduso ni Gullas kinsa sakop sa Board of Trustees sa TCC atol  sa ilang tigum sa Commission on Higher Education-7. Usa ka semana sa iyang paglingkod isip kasamtangang pangulo sa TCC, si Dr. Joseph Sol Galleon miluwat sa katungdanan tungod sa giingong pressure sa trabaho.

Si Gullas nagkanayon nga bisan kinsa nga mapiling presidente sa TCC kinahanglang mohatag kini og full-time service sa tunghaan subay sa CHED Memorandum Order No. 04 ug sa Talisay City Ordinance No. 2008-11. Ubos sa CHED Memorandum ug sa Section 6 sa Talisay City Ordinance nga ang molingkod nga presidente sa tunghaan kinahanglang mohatag kini og full-time nga serbisyo.

Nunot niini, ang Commission on Audit (COA) nipatawag sa kanhi mayor sa siyudad nga karon konsehal, Socrates Fernandez, kabahin sa pagdawat kaniadto kang Dr.Tomas Ramos isip presidente sa TCC kinsa niadtong higayuna mao usab ang pangulo sa Lapu-Lapu City College.

Matud sa COA nga isip presidente sa duha ka tunghaan posibleng masakripisyo niini ang iyang oras sa pagserbisyo sa TCC o ba kaha ngadto sa Lapu-Lapu City College.

Human napupos ang kontrata ni Ramos sa TCC, ang BOT wala na motudlo og permanenteng presidente sa tunghaan.

Hinuon ang BOT mitudlo kang kanhi city administrator Richel Bacaltos kinsa nagtudlo sa University of San Jose Recoletos.

Sa milabay’ng buwan, ang TCC nakontrobersiya human si Mayor Johnny de los Reyes mitudlo kang Dr. Paulus Mariae Cañete isip presidente apan kini gikwestiyon kay wala moagi sa BOT. Tulo ka pangalan ang mitumaw karon nga piliang mahimong presidente sa TCC nga sila si Dr. Edgar Martinez, usa ka Dean sa TCC, City Legal Officer Alfredo Sipalay ug Dr. Victor Villaganas, presidente sa Cebu Technological University (CTU).

Si de los Reyes kinsa maoy chairman sa BOT nagkanayon nga ang desisyon mag-agad sa mayoriya sa mga miyembro sa BOT sa pagpili og presidente sa TCC. (BANAT NEWS)