Mga mama apil sa naghubo

CEBU, Philippines - Dili lang mga bata kondili lakip na ang mga hamtong nga gituohang mga inahan sa pipila sa mga batang naluwas sa kapolisan gikan sa usa ka Australian national ang naghubo atubangan sa camera sa maong suspek.

Kini human ang kapulisan sa lungsod sa Cordova nakakuha og mga hulagway sa mga hamtong ug mga bata nga pulos hubo ang kalawasan nga naka-save sa Universal Serial Bus (USB) nga iya sa dinakpang langyaw.

Gipasakaan na og tulo ka kaso kagahapon sa kapulisan ang Australian national nga Peter James Robinson.

Kahinumdoman nga si Robinson gisikop sa kapulisan sa Cordova inabagan sa tabang sa Children’s Legal Bureau niadtong miaging adlaw sa usa ka beach resort uban sa kinse ka mga menor de edad.

Matud ni Sr. Insp. Alexander Nuñez, hepe sa Cordova Police Station ang kaso nga ilang gipasaka batok kang Robinson mao ang kalapasan sa Republic Act 7610 kon Child Abuse, Republic Act 10364 kon Expanded Anti- Human Trafficking in Persons ug ang ikatulo mao ang kalapasan sa Republic Act 9775 sa Anti Child Pornography.

Gidugang ni Sr. Insp. Nuñez nakakuha sila og USB gikan sa bag sa suspek dihang ilang gitan-aw duna kini mga hulagway sa mga menor de edad nga hubo ug uban niini nagduwa pa sa ilang kinatawo.

Subo usab nga pamalandungon tungod kay dunay mga hulagway sa mga bata uban sa ilang mga inahan nga pulos usab naghubo.

Si Nuñez miingon nga human nila mapasaka ang kaso palawman pa nila ang ilang imbestigasyon ug pangitaon ug ilhon ang mga inahan nga nakita sa hulagway.

Kini alang na sa kaso nga ilang ipasaka batok sa maong mga inahan nga mitugot ug mihubo atubangan sa camera. “Lain ni nga kaso atong ipasaka batok aning mga ginikanan,” matud ni Nuñez.

Sa pagkakaron, ang maong langyaw nagdumili pa gihapon sa pag-atubang sa mga tigbalita ug namatikdan nga sulod gawas ang iyang mga bisita ug gani ang ubang bisita ni Robinson paryente sa mga bata kinsa midapig pa sa maong langyaw.  (BANAT NEWS)