Gisupak ang bag-ong balaod

CEBU, Philippines - Mga drayber og passenger jeepney sa Mandaue misupak sa pagpatuman sa Joint Administrative Order No. 2014-01 nga naglatid og dagko na kaayo nga bayranan sa multa sa mga drayber o operator nga makahimo og kalapasan.

Ang mipadayag niini mao si Romeo Armamento, presidente sa Mandaue United Driver’s Association-National Confederation Transport-worker Alliance (MUDA-NCTA).

Matud ni Armamento nga ilang gipadayag ang ilang pagsupak diha nga gipahigayon ang public hearing sa maong balaod apan natingala lang sila nga wala kini hatagi og konsiderasyon sa kadagkoan sa LTFRB ug Land Transportion Office (LTO).

Ang pagpatuman sa kontrobersyal nga memorandum nga nagtangag na og dagko kaayo nga multa gisugdan na sa pagpatuman sugod kaniadto’ng Huwebes sa miagi’ng semana.   

Giklaro ni Armamento nga wala sila mosupak sa pagpahamtang og dako’ng multa alang sa mga kolurum nga sakyanan tungod kay makaayo man kini kanila nga legal ang pagpamasahero.

Dugang ni Armamento nga wala hinuon sila mosalmot sa gipasiugdahan sa mga sakop sa PISTON tungod kay alang kanila sa MUDA-NCTA ang pagpadayag sa pagsupak sa Joint Administrative Order 2014-01 dili angay nga ipakita pinaagi sa paghimo og kalihokan sa kadalanan.

Gipasabot ni Armamento nga ang tukma’ng pagahimoon sa pag-alkontra sa maong kamandoan sa DOTC wala na kinahanglana ang paghunong og pamasahero sa mga drayber tungod kay maoy masakripisyo ang mga pasahero.

Gitataw ni Armamento nga dili ang pasahero maoy angayan nga pahimungtan sa mga drayber ug operator sa pagpadayag nila og pagsupak sa gipahamtang nga dagko’ng multahan.

Matud ni Armamento nga ang pagpasiugda og kalihokan sa mga drayber sa kadalanan dili makaapekto sa mga opisyal sa DOTC ug sa mga sanga’ng buhatan sa LTO ug LTFRB kay nagbaton man sila og kaugalingon mga sakyanan.

Ang mga pasahero ug mga drayber nga pulos kabus ang kahimtang maoy maapektohan ug dili ang mga opisyal sa kagamhanan nga maoy nagpasiugda sa pagpaburot og dagko’ng kantidad nga multa sa kalapasan sa gilatid nga lagda sa kadalanan.

Si Armamento mipasabot nga daghan ang wala masayod ug pagtuo lang nga ang kolurum ra nga sakyanan ang dagko kaayo ang multa apan apil diay ang ubang kalapasan sa lagda sa tukma nga pagmaneho.

Dugang pa ni Armamento nga nasentro lang sa kolurum ang pagtuo sa katawhan kay ang kadagkoan sa LTO ug LTFRB mao man usab kini ang ilang gipadako nga mga isyu ug wala kaayo itug-an ang multa sa uban nga kalapasan.

Matud ni Armamento nga dili lang sila nga mga PUJ drayber ug operator ang masugamak sa dako’ng multahan kun dili lakip na ang mga tag-iya og pribado’ng sakyanan kun makahimo kini og kalapasan.

Iyang gitataw nga ubos sa Joint Administrative Order No. 2014-01 walay mahibilin sa tanang habal-habal nga nagbiyahe sa kalungsoran ug hilit nga kabarangayan kay maisip man usab sila nga mga kolorum ug makamulta sila og P6 mil kada higayon nga madakpan. (BANAT NEWS)