Drugas sa Sugbo dili alarming — PNP
CEBU, Philippines - Sukwahi sa pangangkon sa Philippine Drug Enforcement Agency, dili alarming ang problema sa drugas sumala sa kapolisan sa Sugbo.
Atol sa ika-75 nga Talakayang Isyung Pulis sa Police Regional Office-7, gipadayag ni Supt. Rex Derilo, hepe sa Provincial Intelligence Branch, nga dili alarming ang problema base sa ilang impormasyon.
Nagtoo si Derilo nga ang subsob nilang operasyon ug pagsikop sa mga drug pushers ang gitan-aw sa uban nga grabe na ang problema sa drugas.
Matud ni Derilo nga mas taas ang ilang ihap sa mga nasikop nga mga pushers karong tuiga itandi sa nangaging tuig.
Gikan Enero hangtud Hunyo 2013, mitala ang kapolisan og 710 ka kaso sa drugas samtang miabot sa 1,143 karong tuiga.
Ang tabang sa komunidad ang giisip sa kapolisan nga nakatabang sa pag-ila sa mga drug personalities sa ilang lugar.
Matud ni Sr. Supt. Noel Gillamac, direktor sa Cebu Provincial Police Office, nga daghang mga text messages ang ilang madawat matag adlaw nga magpahibawo sa ilang nasayran nga kalihukan sa drugas.
Gipasabot ni Gillamac nga tanang mensahe ilang ikonsiderar ug subayon sa pamasin nga dunay kamatuoran ang impormasyon.
Gipasalig sa kapolisan nga hugtan pa nila ang kampanya batok ilegal nga drugas uban sa bahad ngadto sa mga drug lords ug pushers nga kun dili kini mo-undang, sila na ang sunod nga masikop. (BANAT NEWS)
- Latest
