CITRASCO dili na mangayo’g usbaw sa pletehan

CEBU, Philippines - Gibakwi na sa Cebu Integrated Transport Services Cooperative kon CITRASCO ang ilang demanda nga nangayo’g P2.50 nga umento sa minimum nga pletehan sa mga passenger jeepneys.

Hinuon, dungan sa pagbakwi sa ilang petisyon, ang tsirman sa CITRASCO nga si Ryan Benjamin Yu miawhag sa kadagkoan sa Land Transportation Franchising and Regulatory Board (LTFRB) nga hingusgan ang kampanya batok sa mga kolurum nga sakyanan nga usa sa nakapaalkanse kanila.

Ang kalit nga pagsibog sa CITRASCO sa pagpangayo’g usbaw sa pletehan nakapakurat kaayo sa mga mitambong sa public hearing kagahapon didto sa Cebu Normal University (CNU).

Apan si Mayor Michael Rama ug ang mga sumasakay nahinangop kaayo sa hukom sa CITRASCO, apan dunay mga jeepney drivers nga wala makagusto kay tinguha gayud nila nga maumentohan ang pletehan.

Ang mao nga public hearing gitumong unta aron mapaminaw ang habig sa mga sumasakay bahin sa gipangayo nga dugang pletehan sa jeepney.

Gitataw ni Yu nga sa pagbakwi nila sa petisyon kinahanglan usab nga tumanon sa LTFRB ang paghingusog sa pag-implementar sa mga lagda sa Joint Administrative Order 2014-01, ilabi na batok sa mga kolurum.

Ang gibasehan kaniadto sa CITRASCO pagpangayo og usbaw sa pletehan mao ang padayong pagsaka sa presyo sa pyesa sa sakyanan lakip na usab ang kamahal sa krudo ug gasolina.

Apan atol sa gihimo’ng strike sa grupo’ng Piston sa miagi’ng semana, nakita ni Yu nga kun hingpit lang nga mawagtang ang mga kolurum nga sakyanan mas motaas ang ilang kita hinungdan nga nakahukom sila pagsibog sa ilang petisyon.

Ang maong desisyon sa CITRASCO nakaani og lain-laing  reaksyon. Si Rudy Laconza, pangulo sa grupong ATOMIC ug usa ka jeepney driver, miingon nga dili makiangayon alang kanila ang maong desisyon kay giingo’ng wala sila hatagi og higayon aron makapadayag sa ilang habig.

Samtang ang kadagkoan sa LTFRB-7 miingon nga bisan pa man og wala ang kondisyon sa Citrasco nga paspasan ang paghimo’g kampanya sa mga dakponon, gihingusgan nila ang paggukod sa mga kolurum nga sakyanan. (BANAT NEWS)