Hinabako nagkabata og maayo — DOH7

CEBU, Philippines - Gibutyag sa Department of Health (DOH-7) nga nagkagamay na lang karon ang tigpanigarilyo sukad nga gipatas-an ang Sin Tax Law apan namatikdan hinuon nga nagkabata karon ang edad sa mga tawong manigarilyo.

Matud ni Dr. Christopher Samson sa DOH-7 dinhi sa Central Visayas partikular na sa Negros Oriental ang  labing bata nga nagsugod na sa pagpanigarilyo nag-edad pa lang og 5-anyos.

Sigon pa ni Samson nga ang rason nganong nagkabata ang mga nanigarilyo tungod kay suguon sila sa ilang mga ginikanan nga hinabako sa pagpalit og sigarilyo sa tindahan.

Hinuon gihulagway sa DOH-7 nga dako ang epekto sa pagpasar sa Sin Tax Law kay nigamay usab ang nanabako tungod sa kamahal na sa presyo sa sigarilyo.

Samtang si Jorey Lagon miingon nga nagsugod siya sa pagpanigarilyo dihang nagpanuigon kini og 20-anyos iyang gibutyag nga nagalgal lang siya sa iyang mga barkada kaniadto.

Giangkon ni Lagon nga walay nahatag nga kaayuhan kaniya ang pagpanigarilyo ngadto kaniya apan wa siya mobiya niini tungod kay alang niya ang sigarilyo tambal sa luod.

Si Samson mipahimangno usab bahin sa nauso karon nga electronic cigarette kay matud pa makadaot gihapon kini sa panglawas sa tawo tungod kay duna gihapon kini nicotine nga maoy giingong maka-adik, kini maoy rason nganong wala nila kini gi-encourage. Nasayran nga ang panigarilyo maoy gitumbok nga hinungdan sa sakit nga cancer ug nag-unang hinungdan sa paghinay sa resistensya  sa lawas sa tawo. - /EIM (BANAT NEWS)