Sakyanan sa mayor nakadasmag patay

CEBU, Philippines - Patay ang usa ka drayber sa motorsiklo human banggai sa Land Cruiser nga gipanag-iya ni Tuburan Mayor Democrito Diamante Jr. niadtong Domingo sa hapon sa National Highway, Tabunok, lungsod sa Tabuelan.

Ang biktima nailhan nga si Janrel Flores, 23-anyos, taga Barangay Ga-ang, lungsod sa Tuburan samtang ang drayber sa sakyanan sa mayor mao si Roel Jore Lopez, 41-anyos, taga Sitio Punta, Barangay 8 sa samang lungsod.

Sa imbestigasyon nasayran nga si Lopez padulong sa Tabunok sa dihang nisugat sa iyang agianan si Flores nga nagmaneho sa motorsiklo.

Matud ni PO1 Jerome Millor sa Tabuelan Police Station nga tungod sa ka kusog sa panagbangga, miboto ang wala nga ligid sa atubangan nga bahin sa Land Cruiser hinungdan nga mituyok ang sakyanan ug nawad-an sa kontrol ang drayber.

Ang Land Cruiser mibangga sa tindahan nga gipanag-iya sa magtiayong Rhea ug Remedios Ruelo kinsa nakaangkon usab og mga samad.

Daling gidala si Flores sa Tuburan District Hospital apan gideklarar kini nga patay na.

Boluntaryong mi-surender si Lopez sa kapolisan sa Tabuelan human sa insidente.

Nasuta usab sa imbestigasyon nga wala’y head light ang motorsiklo sa dihang gikasugat sa Land Cruiser ingon man wala’y plate number ug lisensiya.

Gawasnon na si Lopez human gipasalig ni Mayor Diamante nga abagahon ang gasto sa pagpalubong sa patay’ng lawas ni Flores ug dugang pang gastohanan lakip na ang nagubang tindahan sa mga Ruelo. (BANAT NEWS)