“Killer” ni King nadakpan

CEBU, Philippines - Nasikop na sa Davao City Police Office (DCPO) ang gitumbok nga mipusil patay sa Sugboanong negosyante nga si Richard King.

Kini ang gipamahayag ni Chief Inspector Jade Clamor ang tigpamaba sa Police Regional Office 11 ug sa Special Operation Task Group nga gitahasan sa imbestigasyon sa maong kaso.

Matud pa ni Clamor nga nahinabi sa mga tigbalita pinaagi sa telepono nga , alas 10:30 sa buntag, ilang nasikop ang gunman sa Barangay Maa, Davao City, nga naila nga si Paul Dave Colina Labang, 24, nga taga Toril, Davao City.

Sumala pa ni Clamor nga duna’y lima ka mga testigos ang positibong mitudlo ni Labang nga maoy mipusil patay ni King.

Atol sa pagsikop ni Labang, nakuha sab sa kapulisan gikan sa iyang posisyon ang .45 caliber pistol.

Apan sa pangutana kung kinsa ang nakatug-an sa kapulisan aron masikop ang dinakpan, gipasabot ni Clamor nga dako ang iyang pagtuo nga ang impormasyon gikan sa mga sibilyan.

Sa pagkasikop ni Labang, gitug-an sab ni Clamor nga posibling duna gayo’y makaangkon sa reward money nga gigahin sa kapulisan sa makahatag impormasyon aron masikop ang gunman kantidad 1.3 million pesos.

Bisan pa man og nasikop na ang gunman sa krimen, apan giangkon ni Clamor nga wala pa gayud nila ma-establesar kung unsa gayod ang motibo sa pagpatay ni King.

Gipasabot sab sa opisyal nga sa maong kalamboan duna sila’y himoon nga case conference nga tambongan sa mga ahensya nga naapil sa pagtuon sa maong kaso, aron ilang hisgutan kung kinsa gayod ang matudlo nga mastermind sa pagpatay ni Richard King.

Gitanggong na sa Davao Police Office detention cell ang dinakpan, samtang dugang imbestigasyon pa ang gihimo sa kapulisan.

Ang pamilyang King andam mohatag og P1 milyon nga reward niadtong makatabang sa pagkasikop sa mga responsable sa kamatayon sa negosyante, madugang kini sa P300 mil nga gitagana usab ni Davao City Mayor Rodrigo Duterte.  (BANAT NEWS)