Panigarilyo sa Talisay City Hall gidili

CEBU, Philippines - Gihingusgan sa kagamhanan sa dakbayan sa Talisay ang kampanya batok sa pagpanigarilyo sulod sa City Hall lakip na sa mga kawani.

Buot si Mayor Johnny de los Reyes nga ipatuman ang “100% smoke free workplace policy” diha sa City Hall.

Niadtong Miyerkules ang mga opisyal sa City Hall unang gipaubos sa orientation subay sa hiniusang memorandum circular sa Civil Service Commission (CSC) ug sa Department of Health (DOH) sa pagdili pagpanigarilyo sa mga lugar o buhatan sa gobiyerno. Sa maong orientation gipasabot ang mga mahimong kadaut sa panglawas sa tawo nga mugna sa pagpanigarilyo ug paghanggap sa aso sa sigarilyo.

Ang mga kawani sa City Hall gibahin sa unom ka hugpong ug gitakda ang nagkalain-laing adlaw sa ilang pagpaubos sa orientation. (BANAT NEWS)