Idlas nasikop sa hantakan
CEBU, Philippines - Nasikop ra gyud sa kapolisan sa usa ka hantakan ang usa ka giingong idlas nga dakponon sa lungsod sa Argao.
Ang dinakpan naila nga si Alan Alcayde Milay, 36, minyo ug lumad nga taga Bug-ot, Argao ug giingong lima na ka higayon nga nakaikyas sa mga pulis nga misuway unta og dakop kaniya.
Matud ni Police Insp. Alejandro Batobalonos, hepe sa Argao Police Station, nga nahinabi sa Banat News nga usa ka tawag ang ilang nadawat nga nagpahibalo nga adunay usa ka armadong lalaki ang nakit-an nga nagdula og hantak sa Barangay Talaga.
Nakompirmar nga si Milay alyas “Paldo†ang nagdala og armas nga dugay nang gipangita sa kapolisan sa maong lungsod.
Si Milay nakabantay pag-abot ni Batobalonos sa lugar ug misulay unta og sakay sa iyang motorsiklo apan gituparan na siya og mga polis sa hantakan.
Nakuha sa kapolisan sa posisyon ni Milay ang usa ka .357 revolver nga dunay upat ka bala ug usa ka granada.
Si Milay ang gitudlo nga usa sa mga labad sa ulo sa maong lungsod gumikan sa kanunay’ng pagpaboto sa armas.
Duna na’y mga kaso sa pagpamusil si Milay sa Argao ug Dalaguete ug nalista usab kini nga nalambigit sa kalihukan sa drugas.
Gitanggong na sa Argao detention cell ang dinakpan ug pasakaan og kasong illegal possession of firearms and explosive. (BANAT NEWS)
- Latest
