Bana gipadakop sa asawa nakuhaan og shabu
CEBU, Philippines - Nakuhaan og gamay’ng pakete sa shabu ang usa ka bana nga gipadakop sa iyang asawa gumikan sa pagma-oy dihang nahubog kagahapon sa kadlawon sa may dalan A.S. Fortuna, Banilad, Dakbayan sa Mandaue.
Si SPO1 Renato Canja sa Presinto 4 sa Mandaue City Police Office miila sa dinakpan nga si Bernard Badillas, 53-anyos.
Matud ni Canja nga nangayo og panabang sa ilang buhatan ang asawa nga si Lani Badillas kinsa mipasangil nga gihulga siya ug ilang mga anak nga hutdon sa pagpatay.
Daling gisanong sa kapolisan ang hangyo sa asawa ug ilang naabtan ang bana nga padayong nanghagis hinungdan nga ilang gidakop.
Atubangan sa asawa, girikisa ang bulsa sa bana ug maoy nakuha ang gamay nga pakete sa shabu.
Ang dinakpan nagtingkagol na sa selda sa kapolisan ug pasakaan sa kasong kalapasan sa Comprehensive Dangerous Drugs Act of 2001 ug kalapasan sa ordinansa sa dakbayan nga nagdili sa paghubog-hubog. (BANAT NEWS)
- Latest
