Sen. Revilla gipriso na

CEBU, Philippines - Napaslak na sa detention si Senador Ramon Revilla Jr. sa Philippine National Police (PNP) headquarters sa Camp Crame human siya boluntaryong mitahan sa Sandiganbayan kagahapon sa buntag adlaw nga Biyernes.

Si Revilla gikuyogan sa mga sakop sa pamilya, abogado ug kahigalaan dihang mihapit kini sa Sandiganbayan ug pagkahuman gidala sa PNP Custodial Center.

Sama sa ordinaryong kriminal si Revilla gidala sa PNP Multi-Purpose Hall diin siya gikuhaan og fingerprints ug mug shots ug gipaubos sa medical examination una pa kini gidala sa iyang detention cell.

Ang pagtahan ni Revilla iyang gihimo human milusot ang iyang warrant of arrest gikan sa Sandiganbayan  tungod sa kasong graft ug plunder may labot sa pasangil nga nakadawat kini og kickbacks gikan sa pork barrel funds pinaagi sa mga peke nga mga foundations sa kaubang akusado nga negosyanteng si Janet Lim-Napoles.

"Even in my dreams I didn't see this coming," matud pang Revilla diha sa iyang mansyon sa Cavite atubangan sa iyang kabanay ug supporters.

Gawas ni Revilla, mitahan usab ang iyang  chief political staff diha sa Sandiganbayan nga si Atty.  Richard Cambe. Si Cambe gikuyogan sa iyang legal counsel nga si Michael Ancheta ug mipaubos sa processing alang sa iyang boluntaryong pagtahan.

Apan si Ancheta misang-at og mosyon sa First Division nga mihangyong adto i-detain si Cambe sa PNP-Custodial Center diin usab gi-detain si Revilla tungod sa seguridad niini. (Philstar.Com/EIM)