Upat ka kawani sa Toledo niuli sa nakit-ang alahas

CEBU, Philippines - Giuli sa upat ka kawani sa Public Service Division sa kagamhanan sa Dakbayan sa Toledo ang nakit-ang mga mahalon nga butang nga giingong aksidenteng gilabay sa basurahan.

Ang mga kawani mao sila si Pablito Aplise, Nico Labasag, Jonathan Labanis ug ang drayber sa garbage truck nga si Adrian Tanguan, pulos hingkod ang pangedaron.

Nasayran nga gikan nangolekta og mga basura ang grupo sa sayong buntag sa may Barangay Poblacion.

Usa kanila ang nakakita nga adunay bag nga gilabay diin paghiling niini adunay sulod nga alahas ug mahalong relo. Imbis ibaligya, ilang gidala ang maong mga mahalong butang sa ilang buhatan ug giuli sa tag-iya.

Wala hinoon matino kun pila ang kinatibuk-ang kantidad sa maong alahas ug relo nga nakit-an sa mga kawani sa PSD.

Matud ni Rex Ybañez, officer-in-charge sa PSD, nga angayang ipasegarbo ug dayegon ang iyang mga sakop tungod sa gipakitang tinud-anay nga serbisyo ug kasaligan nga mga empleyado. (/GMR)(BANAT NEWS)