Nanulis og taxi napusilan

CEBU, Philippines - Nakulatahan ug napusilan pa ang usa sa duha ka tulisan nga misuway unta og tulis sa taxi drayber nga wala’y dalang armas.

Nisukol ang drayber sa Ken Taxi nga si Armando Erosendo sa dihang iyang namatikdan ang duha ka tulisan nga walay armas sa dihang gisuwayan siya og tulis alas 3 kagahapon sa hapon sa Candulawan, Lungsod sa Minglanilla.

Matud ni PO2 Arnel Resente, imbestigador sa Minglanilla Police Station, nga nahinabi sa Banat News nga nagpahatud sa Candulawan ang duha ka suspetsado.

Apan pag-abot sa maong lugar, usa ka tulisan nga milingkod sa likod nga bahin ang mitook sa drayber gamit ang face towel ug ang usa nga naglingkod sa front seat maoy mikuha sa kinitaan sa drayber nga P500.

Sumala pa nga nakabantay ang drayber nga wala’y dalang armas ang duha ka tulisan hinungdan nga misukol siya ug naglinayugay sulod sa taxi.

Nanglayat ang duha ka tulisan sa taxi apan ang usa nga naglingkod sa front seat ang nagunitan sa drayber.

Nakahigayun og sikad sa tiyan sa drayber ang tulisan hinungdan nga nakagawas sa taxi apan usa ka habal-habal drayber nga nakalabay sa maong lugar ang nitabang kang Erosendo.

Matud ni Erosendo nga iya na lang nakit-an nga gigukod na sa mga tawo ang tulisan ug nadungog niya ang sunod-sunod nga boto sa armas.

Ang tulisan ang gipusil kinsa matud ni Resente ubay-ubay nga igo sa lawas ang naangkon sa tulisan kinsa gidala sa Minglanilla District Hospital.

Gihulagway ni Resente nga kritikal ang sitwasyon sa tulisan nga napusilan kinsa wala pa matino ang pangalan ug ang pinuy-anan. (/GMR)(BANAT NEWS)