Purisima mimando dalion pagsulbad ang kaso ni King
CEBU, Philippines - Duna’y himoon nga command conference karong adlawa sa Police Regional Office (PRO) 7 diin usa sa mga hisgutan ang nahitabo nga pagpatay sa negosyante nga si Richard King.
Sa nakuha nga impormasyon sa Banat News nga mismo si Philippine National Police (PNP) Chief Allan Purisima maoy mimando sa maong command conference nga patambungan sa mga opisyal sa Criminal Investigation and Detection Group (CIDG) Region 6, 7, 11, hepe sa Davao City Police Office, mga sakop sa National Bureau of Investigation (NBI) ug mga intelligence units sa PRO 7.
Tukion sa maong komperensiya ang mga update sa maong kaso ug pagsuta ‘sab kung kinsa gayud ang mastermind sa maong pagpatay ug sa motibo. Si King kinsa nanag-iya og mga negosyo sa Kabisay-an ug didto sa Mindanao giingong dunay mga gikabanging mga impluwensiyadong tawo.
Sa nasayran nga una nang gikataho nga duna na’y gi-imbitar ang kapulisan sa Davao nga posibleng suspek apan gibuhian dayon human nasuta nga wala kini kalambigitan sa maong panghitabo. (/EIM)(BANAT NEWS)
- Latest
