8-anyos naigo sa saag nga bala

CEBU, Philippines - Usa ka 8-anyos nga batang lalaki naigo sa saag nga bala sulod sa ilang balay sa Sitio Kalinaw, Barangay Luz, dakbayan sa Sugbo niadtong Huwebes sa gabii.

Ang maong biktima kauban sa iyang mga ginikanan nga sila si Diosdado ug Aida Laplana diha sa ilang balay dihang kalit kining nalup-og.

Ang inahan sa bata mitug-an sa kapolisan nga nagbarog ang iyang anak sa sala dihang kalit silang nakadungog og lagapak sa ilang atop, kalit lang nga mihilak ang iyang anak kay misakit ang iyang paa.

Ang papa sa bata nga dali nga miduol sa iyang anak ug diha niya nakita nga nagkadugo na kini ug nabuslot ang tuo nga paa niini. Dali nilang gidala sa Perpetual Succor Hospital ang anak.

Si SPO4 Rey Cuyos, ang imbestigador sa Homicide Section sa Cebu City Police Office (CCPO) nga nahinabi sa Banat News, mitug-an nga subayon pa nila asa gikan ang maong bala nga milapos sa atop sa maong       balay.

Nakuha sa kapulisan  sa crime scene ang usa ka slug gikan sa wala pa matino nga kalibre sa armas. (Jojo C. Ugdol ug Jasmin Anais R. Llanillo, USJ-R Intern/EIM)(BANAT NEWS)