Imahen sa Birhen mihilak og dugo

CEBU, Philippines - Gidagsa sa mga tawo ang usa ka pribadong kapilya sa Sitio Lagang, Barangay Ocaña, Carcar City tungod sa giingong paghilak og dugo sa imahe sa Birhen sa Fatima.

Si Soña Regis, 44, kinsa tag-iya sa gamay nga kapilya miingon nga iyang 5-anyos nga anak ang unang nakakita sa maong milagro niadtong Domingo.

Matud pa, dunay presko nga dugo sa aping niini nga midagayday gikan sa iyang mga mata ug ang kamot niini mitakilid ug daw nahiwi ang kapa.

Si Soñia miingon nga unang gisultihan sa anak ang amahan niini nga si Nelson bahin sa dugo sa mata sa Birhen apan wala kini motuo.

Matud pa nga niadtong Lunes na siya nakakita sa imahen nga nagkadugo ang nawong, ilong, ug dughan niini ug pagkasunod adlaw iyahang gisultihan ang mga silingan ug sukad niadto midagsa na ang mga tawo diha sa ilang kapilya.

Sumala pa ni Soñia, daghang masakiton, deboto, ug taga-laing lugar ang midagsa sa ilang kapilya  aron mag-ampo ug mihikap.

Ang imahen nga pinalit niya sa Lindogon Parish sa Simala, Sibonga, onse na ka tuig ang milabay ug gipistahan nila kini matag Agosto 11.

Nagtuo siyang usa kini ka signos nga basin adunay katalagman ang maabot sa ilang lugar. Nagtuo sab siya nga basin og nangluod ang imahen tungod tulo na ka Domingo  nga wala niya kini madala sa iyang pagsimba.

Apan, si Monsignor Esteban Binghay, Episcopal Vicar sa mga Simbahan mi-awhag sa katawhan nga dili dayon motuo sa maong milagro kay matud pa dili tanang milagro binuhat sa Ginoo.

Sa pakighinabi kaniya sa Banat News, si Binghay miingon nga daghan na kaayong mga kaparehong panghitabo sama sa  paghilak sa mga imahen sa nasud ang nabaniog apan wala pa g’yud bisa’g usa ang napamatud-an nga tinuod nga milagro.

Aron mapamatud-an nga usa ka milagro ang usa ka panghitabo, matud ni Binghay kinahanglan kini’g lawom nga imbestigasyon.

Dugang niya nga angay ‘sab makita ang mensahe sa maong imahen ug makita nga dunay kausaban ang katawhan.

Ang parish priest nga si Fr. Marlito T. Binondo gitahasan ni Binghay nga mo-imbestiga sa maong talagsaon nga panghitabo. Samtang, nakadawat og daghang kritisismo ang pamilya nga nanag-iya sa imahen.

Matud ni Luisa Largo, nagpuyo duol sa kapilya, adunay nisinggit niadtong Miyerkules nga “Ayaw mo’g tuo ana, pangkwarta ra na nila.”  Mihilak si Largo sa pagkadungog kay deboto siya sa imahen ug kusog iyang pagtuo nga milagro g’yud kini.

Sa bahin sa pamilya nga nanag-iya sa imahen, sirad-an na unta nila ang kapilya tungod sa mga negatibong mga komentaryo sa mga tawo apan daghan ang mihangyo nga dili lang pasirad-an kay daghan ang matabangan niini.

Sa laing bahin, si Barangay Captain Dario Ramos kinsa motuo nga dunay milagro mipahulam og tent sa kapilya aron dunay kapasilongan ang mga tawong midagsa.

Gihangyo niya ang pamilya nga dili mangayo og donasyon sa mga deboto ug modawat lang sila og mga buwak ug kandila.

Apan, matud ni Soñia, ang mga deboto ra maoy nagbilin og kwarta sa imahen bisan og wala sila mangayo niini. Gamiton na lang nila ang kwarta sa umaabot nga pista sa Birhen sa Agosto.( /EIM)(BANAT NEWS)