Doktor nga environmentalist ug cave diver nalumos

CEBU, Philippines - Patay ang usa ka doctor ug environmentalist human kini malumos samtang nag-dive sulod sa usa ka langub sa Enchanted River sa Hinatuan sa Surigao del Sur niadtong Martes.

Ang namatay naila nga si Dr. Alfonso Amores, usa ka surgeon ug professional nga diver nga nag-train pa didto sa Estados Unidos ug igsuon ni Lapu-Lapu City Vice Mayor Mario Amores.

Matud pa nga siya uban sa lain pang mga professional divers misawom sa maong underground river aron sa  pagpahimutang og safety measures alang sa shooting sa telebisyon.

Sumala pa nga lisod kaayo ug usa ka dakong hagit sa mga susama niyang cave divers ang Enchanted River  tungod sa kagamay sa entrada niini kay paigo ra ang usa ka diver.

Sumala pa nga sayon kini sudlon apan lisod sa paggawas tungod kay masugatan sa diver ang sulog. Apan nindot ang sulod sa maong langub nga gihulagway nga daw duha ka korte sa basketball ang gidak-on.

Wala na makagawas pa sa langub si Amores niadtong Martes sa buntag ug nakuha kini paglabay na sa walo ka oras.

Si Amores usa ka reconstructive surgeon. Lisensyado nga cave and scuba diver nga nag-train pa niini sa US. Usa sab siya ka environment advocate, ug kampanya niya ang pag-alima sa kadagatan.

Siya ‘sab ang nag-train sa Task Force Kalikasan sa dakbayan sa Lapu-Lapu nga maoy nag-monitor sa mga illegal nga activities sa kadagatan niini ug maoy nangusog sa pagdeklarar sa pipila ka bahin sa kadagatan sa Mactan nga marine sanctuaries. (BANAT NEWS)