Overkill ang pagpatay kang Caña sa Bohol

CEBU, Philippines - Gihulagway sa Commission on Human Rights (CHR-7) nga "overkill" ang nahitabong pag-ambush patay sa hepe sa kapolisan sa Ubay, Bohol nga si Chief Inspector George Caña, niadtong Hunyo 7 ning tuiga diha sa lungsod sa Talibon sa Bohol.

Sigon pa ni Atty. Dante Jagman sa CHR-7 sa interview sa usa ka sibyaanan nga nakita sa ilang imbestigasyon didto sa Bohol nga daghang bala ang miigo sa nawong ug sa ubang bahin sa lawas sa napatay nga hepe.

Gihulagway ni Jagman nga wala na mahitsura ang nawong ni Caña tungod sa kadaghan sa bala nga gipunting sa nawong niini.

Samtang  wala silay nakitang timailhan nga “overkill” ang gihimo sa mga polis sa follow-up operation sa Bien Unido Police, Provincial Special Weapon and Tactics  ug Provincial Intelligence Branch didto sa Playa Beach Resort sa barangay San Pedro, Bien Unido, Bohol niadtong Hunyo 8.

Sa maong follow-up operation kalabot sa pag-ambush kang Caña gikamatay kini sa unom ka mga tawo nga naglakip sa kanhi polis nga si Owen Rosales nga gidudahang drug lord sa naasoy nga lugar.

Sa resulta sa imbestigasyon sa CHR-7, si Atty. Jagman nagkanayon nga mga high powered firearms ang gigamit sa kapolisan aron sa pagbuak sa one way mirror nga bungbong sa mga cottages sa maong resort aron makita ang mga suspetsado sa sulod hinungdan nga dagko usab ang mga samad nga naangkon sa mga namatay nga mga suspetsado.

Ang mga naaresto mao ang usa ka minor de edad, Orlando Garcia, Paulo Avenido ug si Roberto Olalo kinsa niingon nga igo lamang silang giimbitar ni Rosales sa resort apan wala silay labot sa pagpatay sa hepe sa police sa Ubay.  (BANAT NEWS)